បាត់ដំបង៖ នៅម៉ោង ២៣និង ០០នាទីថ្ងៃទី០៤ ខែសីហា ឆ្នាំ២០២១ នៅចំណុចរង្វង់មូលព្រះនរាយស្ថិតនៅក្នុងភូមិអូរចារ សង្កាត់អូរចារ ក្រុង/ខេត្តបាត់ដំបង កម្លាំងកងរាជអាវុធហត្ថខេត្តបាត់ដំបង បានឃាត់ខ្លួនជនសង្ស័យ ០២នាក់ និងបានចាប់យកវត្ថុតាងម៉ាទឹកកក ០១កញ្ចប់ និងម៉ូតូ ០១គ្រឿង។ បច្ចុប្បន្នជនសង្ស័យ និងវត្ថុតាងជំនាញបានកសាងសំណុំរឿងចាត់ការតាមនីតិវិធី។

បាត់ដំបង៖ នៅវេលាម៉ោង ១០ និង ១០នាទីថ្ងៃទី០៥ ខែសីហា ឆ្នាំ២០២១ កងរាជអាវុធហត្ថខេត្តបាត់ដំបងសហការជាមួយកងរាជអាវុធហត្ថខេត្តកំពង់ធំ បានចុះទៅភូមិរំចេក៣ សង្កាត់រតនៈ ក្រុងបានដំបង ខេត្តបាត់ដំបង បានចាប់ខ្លួនជនសង្ស័យ០២នាក់ តាមដីកាបញ្ជាឱ្យចូលខ្លួនរបស់ព្រះរាជអាជ្ញាអមសាលាដំបូងខេត្តកំពង់ធំពីបទលួចរូបថតទៅបង្កើតគណនី facebook ក្លែងក្លាយដើម្បីឆបោកយកប្រាក់របស់អ្នកដទៃក្នុងបណ្ដាញសង្គម facebook ប្រព្រឹត្តកាលពីអំឡុង ខែមីនា ដល់ ខែឧសភា ឆ្នាំ២០២១។ បច្ចុប្បន្នជនសង្ស័យការិយាល័យជំនាញកងរាជអាវុធហត្ថខេត្តបាត់ដំបង បានប្រគល់ឱ្យជំនាញកងរាជអាវុធហត្ថខេត្តកំពង់ធំចាត់ការតាមនីតិវិធី។

ព្រះវិហារ៖ វេលាម៉ោង០២.៣០នាទីថ្ងៃព្រហស្បតិ៍ ទី០៤ ខែសីហា ឆ្នាំ២០២១ កម្លាំងមូលដ្ឋាន កងរាជអាវុធហត្ថស្រុកជ័យសែន បានសហការជាមួយសង្កាត់រដ្ឋបាលព្រែឈើជ័យសែន និងដោយមានការសម្របសម្រួលនីតិវិធីពីព្រះរាជអាជ្ញានៃអយ្យការអមសាលាដំបូងខេត្តព្រះវិហារ កម្លាំងបានឃាត់រថយន្តដឹកឈើ១គ្រឿងម៉ាក់សាំយ៉ុងកែច្នៃគ្មានផ្លាកលេខដឹកឈើប្រភេទលេខ១ផ្ចឹក និងដួងចែម ឈើទាលពុំមានលិខិតអនុញ្ញាត្តនៅភូមិស្អាង ឃុំស្អាង ស្រុកជ័យសែន ដោយបានចាប់យកប្រភេទឈើផឹ្ចក និងដួងចែមឈើទាលសរុបចំនួន ១១៤សន្លឹក។ វត្ថុតាងបានយកមករក្សាទុកនៅសង្កាត់រដ្ឋបាលព្រៃឈើជ័យសែនដើម្បីបន្តនីតិវិធី។

កណ្តាល៖ ថ្ងៃពុធ ទី០៤ ខែសីហា ឆ្នាំ២០២១ លោកវរសេនីយ៍ឯក គឹម សិទ្ធីយ៉ា មេបញ្ជាការរង កងរាជអាវុធហត្ថខេត្ត បានបន្តដឹកនាំកម្លាំងកងអាវុធហត្ថខេត្ត និងកម្លាំងក្រុងតាខ្មៅ ចុះល្បាតចល័ត និងឈរគោលដៅ ក្នុងភូមិសាស្ត្រក្រុងតាខ្មៅ សហការជាមួយកម្លាំងនគរបាលខេត្ត ចុះអនុវត្តសេចក្ដីសម្រេចរបស់រដ្ឋបាលខេត្តកណ្ដាល ស្ដីពីការដាក់ចេញនូវវិធានការរដ្ឋបាលសម្រាប់រយៈពេល១៤ថ្ងៃ ដើម្បីប្រយុទ្ធប្រឆាំង និងទប់ស្កាត់ការឆ្លងរាលដាលនៃជំងឺកូវីដ-១៩។ក្នុងនោះក៏បានណែនាំអប់រំដល់បងប្អូនប្រជាពលរដ្ឋដែលធ្វើដំណើតាមដងផ្លូវ ឲ្យចូលរួមសហការទប់ស្កាត់ និងអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាល និងអនុវត្តវិធានការ ៣កុំ ៣ការពារ។

ត្បូងឃ្មុំ៖ នៅវេលាម៉ោង ២០:៣០នាទី ថ្ងៃទី៣ ខែសីហា ឆ្នាំ២០២១ កម្លាំងមូលដ្ឋាន កងរាជអាវុធហត្ថស្រុកពញាក្រែក សហការជាមួយចុះបម្រាមគោចរ និងបានឃាត់ខ្លួនក្មេងទំនើងចំនួន ០២នាក់ដកហូតថ្នាំញៀនចំនួន ០១កញ្ចប់តូច(ម្សៅក្រាមពណ៌ស)និងដាវ ០២ដើមម៉ូតូ ០២គ្រឿងជនសង្ស័យ និងវត្ថុតាងប្រគល់ឲ្យមន្ត្រីជំនាញកសាងសំណុំរឿងតាមនីតិវិធី។

រតនគិរី៖ នៅរសៀលថ្ងៃអង្គារ ទី០៣ ខែសីហា ឆ្នាំ២០២១ នៅបញ្ជាការដ្ឋានកងរាជអាវុធហត្ថខេត្តរតនគិរី លោកឧត្តមសេនីយ៍ត្រី ថាវ យ៉េន មេបញ្ជាការ កងរាជអាវុធហត្ថខេត្ត បានអញ្ជើញជាអធិបតីក្នុងពិធីប្រជុំ អនុគណៈកម្មការស្រាវជ្រាវ ផលប៉ះពាល់ជាមួយនឹងអ្នកជំងឺកូវីដ-១៩ ដើម្បីប្រយុទ្ធប្រឆាំងជំងឺកូវីដ-១៩។

បន្ទាយមានជ័យ៖ នៅព្រឹកថ្ងៃពុធ ទី០៤ ខែសីហា ឆ្នាំ២០២១នេះ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមដំណើរជាមួយលោកឧត្តមសេនីយ៍ទោ សេង ធារិន មេបញ្ជាការរង ជានាយសេនាធិការយោធភូមិភាគទី៥ បានអញ្ជើញនាំយកថវិកាឧបត្ថម្ភដែលមានមកពីការចូលរួមចំនួន ៣លានរៀលជូនដល់ពលករខ្មែរ២នាក់(ម្ដាយនិងកូន)ដែលបានចាញ់បោកមេខ្យល់ នាំមកពីប្រទេសថៃឆ្លងមកកម្ពុជា ហើយត្រូវបានទម្លាក់ចោលនៅក្នុងចម្ការមីន កាលពីថ្ងៃទី០២ ខែសីហា ឆ្នាំ២០២១កន្លងមកនេះ នៅចំណុចប៉ុស្ដិ៍ប្រាសាទត្បែង ស្រុកថ្មពួក ខេត្តបន្ទាយមានជ័យ។ នារីពលកររងគ្រោះឈ្មោះ ប៉ុក ណាលីន អាយុ២៦ឆ្នាំបានបញ្ជាក់ឱ្យដឹងថា ដោយមានការភ័យខ្លាចពេកព្រោះយប់ងងឹតខ្លាំងទើបខ្លួននិងកូនធ្វើដំណើរដោយមិនបានប្រុងប្រយ័ត្នទើបធ្វើឱ្យខ្លួនដើរធ្លាក់គ្រលុកបណ្ដាលឱ្យបាក់កជើងខាងស្ដាំតែម្ដង។ ដោយឃើញបែបនេះកម្លាំងចម្រុះដែលល្បាតតាមខ្សែបន្ទាត់ព្រំដែនកម្ពុជា-ថៃ…

សៀមរាប៖ ថ្ងៃអង្គារ ថ្ងៃទី០៣ ខែសីហាឆ្នាំ២០២១ កម្លាំងកងរាជអាវុធហត្ថខេត្តសៀមរាប សហការចុះគោលដៅបិតខ្ទប់ កន្លែងព្យាបាលជំងឺកូវីដ-១៩ និងកន្លែងធ្វើចត្តាឡីស័ក្តមានកន្លែងព្យាបាលជំងឺកូវីដ-១៩ វិទ្យាល័យដំដែក, គោលដៅបិតខ្ទប់ ស្រុកសូទ្រនិគម, គោលដៅបិតខ្ទប់ព្រំប្រទល់ស្រុកជីក្រែង ខេត្តសៀមរាប និងខេត្តកំពង់ធំ,  គោលដៅបិតខ្ទប់ផ្សាកំពង់ក្តី និងគោលដៅបិតខ្ទប់ព្រំប្រទល់ស្រុកស្វាយលើ ខេត្តសៀមរាប និងខេត្តព្រះវិហារ។

កណ្តាល៖ នៅថ្ងៃទី១ ខែសីហា ឆ្នាំ២០២១ កម្លាំងមូលដ្ឋាន កងរាជអាវុធហត្ថស្រុកកោះធំ បន្ទាប់ពីទទួលបានព័ត៌មានថាមានករណី ហិង្សាដោយចេតនា ស្ថិតក្នុងឃុំព្រែកថ្មី ស្រុកកោះធំ ខេត្តកណ្តាល ដោយមានការដឹកនាំចង្អុលបង្ហាញផ្ទាល់ពីលោកឧត្តមសេនីយ៍មេបញ្ជាការខេត្ត និងមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្ត កម្លាំងជំនាញបានចុះដល់ទីកន្លែងជាក់ស្តែង ឃាត់ខ្លួនជនសង្ស័យ០១នាក់។ បច្ចុប្បន្នជនសង្ស័យ សមត្ថកិច្ចកងរាជអាវុធហត្ថខេត្តកណ្តាល បានកសាងសំណុំរឿង បញ្ជូនទៅសាលាដំបូងខេត្តតាមនីតិវិធី។

ស្វាយរៀង៖ យោងតាមសំណើរបស់ លោកវរសេនីយ៍ឯក ម៉ម យ៉យ នាយប៉ុស្ដិ៍នគរបាលច្រកទ្វារអន្តរជាតិបាវិត បានស្នើលោកឧត្ដមសេនីយ៍ត្រី សែ វុទ្ធី មេបញ្ជាការ កងរាជអាវុធហត្ថខេត្តស្វាយរៀង ដើម្បីឱ្យកម្លាំងជំនាញផ្នែកសុខាភិបាលយកសំណាកធ្វើតេស្ដរកមេរោគកូវីដ-១៩ ដល់កងកម្លាំងនគរបាល។ ជាក់ស្ដែងនៅថ្ងៃអង្គារ ទី០៣ ខែសីហា ឆ្នាំ២០២១ លោកឧត្ដមសេនីយ៍ត្រី សែ វុទ្ធី មេបញ្ជាការ កងរាជអាវុធហត្ថខេត្តស្វាយរៀង បានបញ្ជាឱ្យកម្លាំងជំនាញផ្នែកសុខាភិបាលកងរាជអាវុធហត្ថខេត្តដឹកនាំដោយ លោកស្រីអនុសេនីយ៍ឯក សុខ សុមន្ថា បានធ្វើការពិនិត្យយកសំណាកធ្វើតេស្តរហ័សរកមេរោគកូវីដ-១៩ ជូនកងកម្លាំងប៉ុស្តិ៍នគរបាលច្រកទ្វាអន្តរជាតិបាវិត និងប្រជាពលរដ្ឋលក់ដូរនៅក្នុងបរិវេនប៉ុស្ដិ៍នគរបាល ដើម្បីមានភាពកក់ក្ដៅប្រាកដប្រជា…