រតនគិរី៖ នៅវេលាម៉ោង ១៣:០០នាទី ថ្ងៃទី១៥ ខែមីនា ឆ្នាំ២០២១ កម្លាំងមូលដ្ឋានកងរាជអាវុធហត្ថក្រុងបានលុង ខេត្តរតនគិរី ដឹកនាំដោយលោក វរសេនីយ៍ត្រី ហៃ វណ្ណារ៉ា មេបញ្ជាការ មូលដ្ឋានកងរាជអាវុធហត្ថក្រុងបានលុង និងដោយមានការសម្របសម្រួលនីតិវិធីពីព្រះរាជអាជ្ញារងអមសាលាដំបូងខេត្តរតនគិរី កម្លាំងបានចុះបង្រ្កាបករណីចែកចាយ រក្សារទុក ឬជួញដូរដោយខុសច្បាប់នូវសារធាតុញៀនស្ថិតនៅភូមិអូរកន្សែង សង្កាត់បឹងកន្សែង ក្រុងបានលុង ដោយបានឃាត់ខ្លួនជនសង្ស័យម្នាក់ និងដកហូតវត្ថុតាងពាក់ព័ន្ធមួយចំនួន។ បច្ចុប្បន្នមន្ត្រីជំនាញបានកសាងសំណុំរឿងតាមនីតិវិធី។

ត្បូងឃ្មុំ៖ នៅវេលាម៉ោង ៦:១៥ ថ្ងៃទី១៥ ខែមីនា ឆ្នាំ២០២១ កម្លាំងការិយាល័យបទល្មើសគ្រឿងញៀន នៃមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តរតនគីរី សហការជាមួយកងរាជអាវុធហត្ថក្រុងសួង ដឹកនាំដោយ លោក វរសេនីយ៍ត្រី ងួន ចាន់អនុប្រធានមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តត្បូងឃ្មុំ បានចុះអនុវត្តដីកាបង្គាប់ឱ្យចាប់ខ្លួនលេខ៣៣ ចុះថ្ងៃទី០៤ ខែកុម្ភៈ ឆ្នាំ២០២១ ចេញដោយលោក ប៊ុន ធី ចៅក្រមស៊ើបសួរសាលាដំបូងខេត្តត្បូងឃ្មុំ បង្គាប់ឲ្យចាប់ខ្លួនឈ្មោះ ផាន់ សុភ័ក្ត្រ ភេទប្រុស…

កំពត៖ នៅវេលាម៉ោង ១១ និង២៥ នាទី ថ្ងៃទី១៥ ខែមីនា ឆ្នាំ២០២១ កម្លាំងការិយាល័យព្រហ្មទណ្ឌ មន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តកំពត បានឃាត់ខ្លួនជនសង្ស័យម្នាក់នៅចំណុចភូមិត្រពាំងបឹង ឃុំត្រមែង ស្រុកឈូក ខេត្តកំពតតាមពាក្យបណ្តឹងរបស់ឈ្មោះ ង៉ែត ចំរើន ភេទប្រុស អាយុ ៣៥ឆ្នាំ មុខរបរនាយកក្រុមហ៊ុនដ្រាហ្គន មានទីលំនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ពីបទរំលោភលើទំនុកចិត្ត កាលពីថ្ងៃទី២៣ ខែសីហា ឆ្នាំ២០២០…

មណ្ឌលគិរី៖ នៅថ្ងៃទី១៦ ខែមីនា ឆ្នាំ២០២១ ចំណុចភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី កម្លាំងអាវុធហត្ថខេត្ត និងសហការរុករកឃើញឈើចំនួន ១៥គោលដៅ បានឈើសរុបចំនួន ៨២៣ សន្លឹកបច្ចុប្បន្នវត្ថុតាង យកមករក្សាទុកនៅសង្កាត់រដ្ឋបាលព្រៃឈើកែវសីមា ដើម្បីបន្តនីតិវិធី។

ក្រចេះ៖ នៅវេលាម៉ោង ០២និង ៤៥នាទីថ្ងៃទី១២ ខែមីនា ឆ្នាំ២០២១ កម្លាំងមូលដ្ឋាន កងរាជអាវុធហត្ថស្រុកឆ្លូង ដឹកនាំរួម ដោយលោក អនុសេនីយ៍ឯក កង ស៊ុម មេបញ្ជាការរងស្រុក បានចុះបង្ក្រាបបទល្មើសព្រៃឈើនៅចំណុចភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ ដោយបានឃាត់ម៉ូតូសណ្តោងរ៉ឺម៉ក ចំនួន ០១គ្រឿង និងឈើអាប្រភេទកកោះចំនួន១៩០សន្លឹក។ បច្ចុប្បន្នវត្ថុតាងប្រគល់ជូនសង្កាត់រដ្ឋបាលព្រៃឈើឆ្លូង ដើម្បីចាត់ការតាមនីតិវិធី។

បាត់ដំបង៖ នៅវេលាម៉ោង ១១ និង ០០នាទីថ្ងៃទី១១ ខែមីនា ឆ្នាំ២០២១ នៅចំណុច ភូមិដំណាក់ហ្លួង សង្តាត់វត្តគរ ក្រុងខេត្តបាត់ដំបង កម្លាំងអាវុធហត្ថខេត្តបាត់ដំបង បានឃាត់ខ្លួនជនសង្ស័យចំនួន ០២នាក់ ពីបទរំលោភលើទំនុកចិត្ត និងក្លែងបន្លំ តាមបណ្តឹងរបស់មេធាវីតំណាងឲ្យក្រុមហ៊ុនចារើនផ្លេនថេសិន ខូអិលធីឌីប្រព្រឹត្តកាលពីអំឡុងខែមេសា ឆ្នាំ២០១៩។

បន្ទាយមានជ័យ៖ យោងតាមពាក្យបណ្ដឹងរបស់ម្ចាស់ម៉ូតូខណៈពេលដែលគាត់ទុកនៅមុខផ្ទះជិតកាស៊ីណូប៉ូលី ស្ថិតក្នុងភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កម្លាំងជំនាញចុះធ្វើប្រតិបត្តិការស្រាវជ្រាវរហូតឈានដល់ការឃាត់ខ្លួនបានជនសង្ស័យម្នាក់ដែលកំពុងបណ្ដើរម៉ូតូដែលលួចបាននៅតាមផ្លូវ ស្ថិតក្នុងភូមិ/សង្កាត់កើតហេតុខាងលើ នៅវេលាម៉ោង១៥ និង៤៧នាទី ថ្ងៃ ខែ ឆ្នាំ ដដែល ព្រមទាំងដកហូតវត្ថុតាងម៉ូតូ០១គ្រឿង និងសម្ភារៈសម្រាប់លួចម៉ូតូមួយចំនួន។ បច្ចុប្បន្នម៉ូតូប្រគល់ឱ្យម្ចាស់ដើមវិញហើយ ចំណែកជនសង្ស័យត្រូវបានកម្លាំងជំនាញបានកសាងសំណុំរឿងតាមនីតិវិធី។

មណ្ឌលគិរី៖ នៅចំណុចភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី កម្លាំងមូលដ្ឋាន កងរាជអាវុធហត្ថស្រុក រុករកឃើញគំនរឈើមួយកន្លែង មានឈើសរុបចំនួន១៦ដុំ ប្រភេទឈើស្រឡៅ (អញ្ញាតជន)។ បច្ចុប្បន្នវត្ថុតាងប្រគល់ឲ្យស្នាក់ការបរិស្ថាន(ណាំរ៉ាម) ដែនជម្រកសត្វព្រៃស្រែពកដើម្បីបន្តនីតិវិធី។

ក្រចេះ៖ នៅវេលាម៉ោង ៩ និង ១៥នាទី ថ្ងៃទី០៨ ខែមីនា ឆ្នាំ២០២១ កម្លាំងមូលដ្ឋាន កងរាជអាវុធហត្ថស្រុកសំបូរ ដឹកនាំដោយ លោក វរសេនីយ៍ត្រី សូត្រ ស៊ីម មេបញ្ជាការមូលដ្ឋានកងរាជអាវុធហត្ថស្រុក សហការជាមួយកម្លាំងអធិការដ្ឋាននគរបាលស្រុកសំបូ និងមន្ត្រីជំនាយរដ្ឋបាលព្រៃឈើ បានចុះបង្ក្រាបការធ្វើសន្និធិផល អនុផលព្រៃឈើដោយគ្មានលិខិតអនុញ្ញាតចេញពីរដ្ឋបាលព្រៃឈើ នៅចំណុចភូមិអូរពោធិ៍ ឃុំក្បាលដំរី ស្រុកសំបូរ ខេត្តក្រចេះ ដោយបានចាប់យកវត្ថុតាង ឈើចម្រុះចំនួន ៤៣ដុំ។ បច្ចុប្បន្នវត្ថុតាងខាងលើ យកមករក្សាទុកនៅសង្កាត់រដ្ឋបាលព្រៃឈើសណ្ដាន់ដើម្បីអនុវត្តបន្តតាមនីតិវិធី។

បន្ទាយមានេជ័យ៖ យោងតាមពាក្យបណ្ដឹងរបស់ជនរងគ្រោះកាលពីថ្ងៃទី០៦ ខែមីនា ឆ្នាំ២០២១ អំពីករណីលួចម៉ូតូ និងទូរស័ព្ទដៃ កាលពីវេលាម៉ោង១៣និង០០នាទី ថ្ងៃទី០៥ ខែមីនា ឆ្នាំ២០២១ នៅចំណុចភូមិបាលិលេយ្យ២ សង្កាត់ប៉ោយប៉ែន ក្រុងប៉ោយប៉ែត។ កម្លាំងអាវុធហត្ថក្រុងប៉ោយប៉ែត បានស្រាវជ្រាវឃាត់ខ្លួនជនសង្ស័យចំនួន០៣នាក់ និងដកហូតវត្ថុតាងម៉ូតូ០១គ្រឿង និងទូរស័ព្ទដៃ០១គ្រឿង ដូចដែលមានភិនភាគក្នុងពាក្យបណ្ដឹង(ប្រគល់ជូនម្ចាប់ដើមវិញ)។ បច្ចុប្បន្នមន្ត្រីជំនាញបានកសាងសំណុំរឿងតាមនីតិវិធី។