ប៉ៃលិន៖ នៅថ្ងៃទី១៤ ខែឧសភា ឆ្នាំ២០២៣ លោក វរសេនីយ៍ទោ យឹម យ៉េន នាយសេនាធិការ តំណាងលោកឧត្ដមសេនីយ៍ត្រី កែវ សុផល មេបញ្ជាការ កងរាជអាវុធហត្ថខេត្តប៉ៃលិន បានប្រជុំជួរត្រួតពិនិត្យកម្លាំងដើម្បីត្រៀមអន្តរាគមន៍ ព្រមទាំងផ្សព្វផ្សាយសេចក្ដីណែនាំរបស់ថ្នាក់លើ ជូនដល់កម្លាំងកងរាជអាវុធហត្ថខេត្ត និងមេបញ្ជាការមូលដ្ឋានកងរាជអាវុធហត្ថក្រុង/ស្រុក ។

កែប៖ នៅថ្ងៃទី១៤ ឆ្នាំ២០២៣ លោក វរសេនីយ៍ឯក សេស សុផល មេបញ្ជាការរងកងរាជអាវុធហត្ថខេត្តកែប បានធ្វើការផ្សព្វផ្សាយនិងណែនាំដល់គ្រប់ជំនាញ និងមេបញ្ជាការ មូលដ្ឋានកងរាជអាវុធហត្ថក្រុង/ស្រុក ត្រូវត្រៀមកម្លាំងមធ្យោបាយគ្រឿងបំពាក់ និងចុះល្បាតតាមដានស្រាវជ្រាវ សហការជាមួយនគរបាលអាជ្ញាធរមូលដ្ឋានភូមិឃុំ និងរង់ចាំបទបញ្ជាថ្នាក់ដឹកនាំ។

តាកែវ៖ នៅថ្ងៃទី១៣ ខែឧសភា ឆ្នាំ២០២៣ កម្លាំងមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តតាកែវ សហការជាមួយមូលដ្ឋានអាវុធហត្ថស្រុកត្រាំកក់ ដឹកនាំដោយលោក វរសេនីយ៍ឯក ង៉ែត ចាន់ធី មេបញ្ជាការរងទទួលជំនាញ ដោយបានទទួលបទបញ្ជា លោក ឧត្តមសេនីយ៍ត្រី សេង មហាមេបញ្ជាការ និងសម្របសម្រួលនីតិវិធីពីព្រះរាជអាជ្ញា អមសាលាដំបូងខេត្តតាកែវ កម្លាំងបានចុះបង្រ្កាបករណីគ្រឿងញៀនជាក់ស្ដែងត្រពាំងក្រឡាញ់ ឃុំអូរស្រាយ ស្រុកត្រាំកក់ ខេត្តតាកែវ ដោយបានឃាត់ខ្លួនជនសង្ស័យបាន១នាក់ និងចាប់យកវត្ថុតាងមួយចំនួន។ បច្ចុប្បន្នជនសង្ស័យរួមនិងវត្ថុតាង ត្រូវបានមន្ត្រីជំនាញកសាងសំរុំរឿងបញ្ជូនទៅសាលាដំបូងខេត្តតាកែវ អនុវត្តន៍តាមនីតិវិធី។

បន្ទាយមានជ័យ៖ នៅព្រឹកថ្ងៃទី១៣ ខែឧសភា ឆ្នាំ២០២៣ លោកវរសេនីយ៍ទោ ភឿក ព្រហ្ម នាយសេនាធិការរង និងនាយអាវុធហត្ថជាច្រើនរូប តំណាងលោកឧត្ដមសេនីយ៍ត្រី បោន ប៊ិន មេបញ្ជាការ កងរាជអាវុធហត្ថខេត្តបន្ទាយមានជ័យ បានប្រារព្ធពិធីក្រុងពិលី សាងសង់អគារស្នាក់នៅរបស់កងកម្លាំងថ្មីបន្ថែមទៀត ដែលមានទំហំ២០ម៉ែត្រx៧ម៉ែត្រ កំពស់៣ជាន់=១៥ម៉ែត្រ នៅក្នុងបរិវេណទីបញ្ជាការដ្ឋានកងរាជអាវុធហត្ថខេត្ត។

កោះកុង៖ នៅថ្ងៃទី១១ ខែឧសភា ឆ្នាំ២០២៣ កម្លាំងកងរាជអាវុធហត្ថខេត្តកោះកុង បានចុះសហការជាមួយកម្លាំងសាខាគយ និងរដ្ឋាករខេត្តឃាត់ចាប់រថយន្តសង្ស័យគ្មានបង្កាន់ដៃពន្ធនាំចូល ១គ្រឿងម៉ាក TOYOTA CAMRY (HYBRID) ពណ៌ស ឆ្នាំផលិត ២០១១ ចង្កូតស្តាំ ពាក់ស្លាកលេខក្លែងក្លាយ ភ្នំពេញ2AB -3517 ពេលដែលម្ចាស់កំពុងបើកបរនៅតាមដងផ្លូវត្រង់ចំណុចគល់ស្ពានត្រើយខាងលិច ទល់មុខទីស្នាក់ការសន្តិសុខ មូលដ្ឋានកងរាជអាវុធហត្ថស្រុកមណ្ឌលសីមា ក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង។ បច្ចុប្បន្នមន្ត្រីជំនាញបានប្រគល់ជូន កម្លាំងសាខាគយ និងរដ្ឋាករខេត្តចាត់ការបន្ត។

ព្រះវិហារ៖ នៅវេលាម៉ោង១៥:៣៥នាទី ថ្ងៃទី១២ ខែឧសភា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកគូលែន ដឹកនាំដោយលោក អនុសេនីយ៍ឯក ចាន់ ស៊ី មេញ្ជាការរងមូលដ្ឋានកងរាជអាវុធស្រុក សហការជាមួយកម្លាំងបរិស្ថានដែនជម្រកសត្វព្រៃគូលែនព្រហ្មទេព កម្លាំងសហគមន៍ព្រៃផ្ដៅ ធ្វើការឃាត់ចាប់យកសន្និធិឈើអារប្រភេទលេខ១ ឈើសុក្រំចំនួន ០១ម៉ែត្រគូប ឈើផ្ចឹកចំនួន ០,៩ម៉ែត្រគូប ក្ដារចំរុះចំនួន ០,៤ម៉ែត្រគូប សរុបឈើទាំងអស់ចំនួន ២.៣ ម៉ែត្រីគុណ ស្ថិតនៅដីឡូត៍ ឈ្មោះ ឌឿន ចំណុចតែល ភូមិសម្បូរ ឃុំស្រយង់ ស្រុកគូលែន។…

កណ្ដាល៖ យប់ថ្ងៃទី១៣ ខែឧសភា ឆ្នាំ២០២៣ លោក ឧត្តមសេនីយ៍ត្រី សំ​ តុលា មេបញ្ជាការ កងរាជអាវុធហត្ថខេត្តកណ្តាល បានដឹកប្រជុំបន្ទាន់ដោយផ្ទាល់ និងតាមរយៈប្រព័ន្ធវីដេអូ (Zoom) ធ្វើការផ្សព្វផ្សាយបទបញ្ជាណែនាំ ពង្រឹងដល់កម្លាំង កងរាជអាវុធហត្ថខេត្ត និងត្រៀមមធ្យោបាយ គ្រឿងបំពាក់ ដើម្បីចេញល្បាតចល័តត្រួតពិនិត្យ ក្តាប់សភាពការណ៍ ព្រមទាំងសហការជាមួយអាជ្ញាធរដែនដីនិងសមត្ថកិច្ចពាក់ព័ន្ធ ដើម្បីការពារសន្តិសុខ រក្សាសណ្តាប់ធ្នាប់ បង្ការ បង្ក្រាប រាល់បទល្មើសដែលកើតមានឡើងដោយជាយថាហេតុក្នុងភូមិសាស្ត្រខេត្តកណ្តាល។

សៀមរាប៖ នៅថ្ងៃទី១២ ខែឧសភា ឆ្នាំ២០២៣ អាវុធហត្ថខេត្តសៀមរាប បានបើកប្រាក់ឧបត្ថម្ភរបស់សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ជូនគណៈយុទ្ធមិត្តចំនួន៣៥ នាក់ ក្នុងម្នាក់ៗទទួលបានថវិកាចំនួន ២,០០០,០០០ រៀល(ពីរលានរៀល)។