ភ្នំពេញ៖ កម្លាំងជំនាញការិយាល័យប្រឆាំងបទល្មើសគ្រឿងញៀន កងរាជអាវុធហត្ថរាជធានីភ្នំពេញ បានចុះបង្រ្កាបនិងឃាត់ខ្លួនជនសង្ស័យចំនួន ០៦នាក់ ជាបន្តបន្ទាប់ ពាក់ព័ន្ធករណីជួញដូរ ឬប្រើប្រាស់នូវសារធាតុញៀនដោយខុសច្បាប់ ដែលប្រតិបត្តិការនេះធ្វើឡើងកាលពីថ្ងៃទី១៩-២០ ខែឧសភា ឆ្នាំ២០២៣ នៅចំណុចផ្លូវបេតុង ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ និងបន្ទប់ជួលលេខ4Bជាន់ទី១ ផ្លូវលំ ភូមិត្រពាំងចេក សង្កាត់ចោមចៅ១ ខណ្ឌពោធិ៍សែនជ័យ និងមួយកន្លែងទៀតនៅចំណុចបន្ទប់ជួលលេខ២២ជាន់ទី២ ផ្លូវបេតុង ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ដោយចាប់យកវត្ថុតាងពាក់ព័ន្ធមួយចំនួនទៀត។ បច្ចុប្បន្នជនសង្ស័យទាំង ០៦នាក់ រួមនឹងវត្ថុតាងត្រូវបានកម្លាំងជំនាញការិយាល័យប្រឆាំងបទល្មើសគ្រឿងញៀននៃកងរាជអាវុធហត្ថរាជធានីភ្នំពេញ…

ព្រះសីហនុ៖ នៅវេលាម៉ោង១:២០នាទីយប់ ថ្ងៃទី២៤ ខែឧសភា ឆ្នាំ២០២៣ មានករណីគ្រោះអគ្គីភ័យឆេះរថយន្តសេរីទំនើប ០១គ្រឿង ម៉ាក Range Rover ផ្លាកលេខ កម្ពុជា 𝐅𝐂𝐀𝐈1668 ពណ៌ស ស្ថិតចំណុចក្រុមទី១ ភូមិ៦ សង្កាត់លេខ៤ ក្រុងព្រះសីហនុ ដោយមូលហេតុបណ្តាលមកពីឆ្លងចរន្តអគ្គិសនី និងឆេះខូតខាតរថយន្ត ០១គ្រឿងស្ទើរទាំងស្រុង។ បន្ទាប់ពីទទួលបានព័ត៌មាននេះ កម្លាំងជំនាញនៃការិយាល័យជំនួយមនុស្សធម៌ និងសង្គ្រោះគ្រោះមហន្តរាយ កងរាជអាវុធហត្ថខេត្តព្រះសីហនុ និងកម្លាំងមូលដ្ឋានកងរាជអាវុធហត្ថក្រុងព្រះសីហនុ បានចេញអន្តរាគមន៍ជួយសង្រ្គោះបាញ់ទឹកពន្លត់ភ្លើង ដោយចូលរួមសហការជាមួយកម្លាំងនគរបាលផ្នែកពន្លត់អគ្គីភ័យនៃស្នងការដ្ឋាននគរបាលខេត្ត ពន្លត់ឱ្យលត់ទៅវិញនៅម៉ោង១:៥០នាទីយប់ ថ្ងៃខែឆ្នាំដដែល។

ត្បូងឃ្មុំ៖ ព្រឹកថ្ងៃទី២៥ ខែឧសភា ឆ្នាំ២០២៣ នៅបញ្ជាការដ្ឋានកងរាជអាវុធហត្ថខេត្តត្បូងឃ្មុំ ដោយមានការអនុញ្ញាតពីលោក ឧត្តសេនីយ៍ត្រី មេបញ្ជាការកងរាជអាវុធហត្ថខេត្តត្បូងឃ្មុំ លោកវរសេនីយ៍ទោ ឡេង គឹមឈាន នាយសេនាធិការ កងរាជអាវុធហត្ថខេត្ត បានដឹកនាំធ្វើបទបង្ហាញផ្សព្វផ្សាយអំពីច្បាប់ស្តីពីការបោះឆ្នោត បទបញ្ជា នីតិវិធីសម្រាប់បោះឆ្នោត និងក្រមសីលធម៌ សម្រាប់ភ្នាក់ងារសន្តិសុខ ទៅកាន់នាយសេនាធិការរង ប្រធាន អនុប្រធានមន្ទីរទាំង៧ នាយ នាយរងការិយាល័យ មេបញ្ជាការក្រុងស្រុក និងត្រូវធ្វើការផ្សព្វផ្សាយបន្តរទៅកាន់ នាយ និងពលទាហានក្រោមឱវាទទាំងអស់ឱ្យបានយល់ជ្រួតជ្រាបផងដែរ។

បាត់ដំបង៖ ព្រឹកថ្ងៃទី២៤ ខែឧសភា ឆ្នាំ២០២៣ លោក ឧត្តមសេនីយ៍ត្រី ហែម វុទ្ធី មេបញ្ជាការ កងរាជអាវុធហត្ថខេត្តបាត់ដំបង បានអញ្ជើញជាអធិបតីក្នុងពិធីបំពាក់ឋានន្ដរសក្ដិ ជូនយោធិន នៃកងរាជអាវុធហត្ថខេត្តបាត់ដំបង ដោយមានការចូលរួមមេបញ្ជាការរង នាយសេនាធិការរង នាយលេខាធិការដ្ឋាន ប្រធានមន្ទីរទាំង៧ នាយការិយាល័យ និងមេបញ្ជាការ មូលដ្ឋានកងរាជអាវុធហត្ថក្រុង/ស្រុកទាំង១៤។

កំពត៖ នៅបញ្ជាការដ្ឋាន កងរាជអាវុធហត្ថខេត្តកំពត ព្រឹកថ្ងៃទី២៤ ខែឧសភា ឆ្នាំ២០២៣ បានធ្វើវិធីផ្សព្វផ្សាយអំពីច្បាប់ស្ដីពីការបោះឆ្នោត បទបញ្ជា នីតិវិធីសម្រាប់ការបោះឆ្នោត និងក្រមសីលធម៌សម្រាប់ភ្នាក់ងារសន្តិសុខបោះឆ្នោត ក្រោមអធិបតីភាព ឯកឧត្ដមបណ្ឌិត តែ ជិនណារិទ្ធិ ប្រធានគណៈកម្មាធិការរៀបចំការបោះឆ្នោតខេត្តកំពត និងលោក ឧត្ដមសេនីយ៍ត្រី ចាប សុទ្ធាវុឌ្ឍន៍ មេបញ្ជាការកងរាជអាវុធហត្ថខេត្ត ដោយមានការពីលោកបញ្ជាការរង នាយសេនាធិការរង ប្រធាន អនុប្រធានមន្ទីរ នាយការិយាល័យ មេបញ្ជាការមូលដ្ឋានក្រុង ស្រុក ប្រធានស្នាក់ការសន្តិសុខ ព្រមទាំងនាយ នាយរងអាវុធហត្ថខេត្តជាច្រើនរូបទៀត។

  ក្រចេះ៖ ថ្ងៃពុធ ទី២៤ ខែឧសភា ឆ្នាំ២០២៣ នៅបញ្ជាការកងរាជអាវុធហត្ថខេត្តក្រចេះ លោក ឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ អញ្ជើញជាអធិបតីភាពក្នុងពិធីប្រកាសតែងតាំងផ្លាស់ប្តូរមុខតំណែង និង បំពាក់ឋានន្តរសក្តិជូនយោធិននៃកងរាជអាវុធហត្ថ ដោយមានការចូលរួមពីលោកមេបញ្ជាការរង នាយសេនាធិការរង ប្រធាន-អនុប្រធានមន្ទីរទាំង៧ មេបញ្ជាការ មេបញ្ជាការរងមូលដ្ឋានកងរាជអាវុធហត្ថក្រុង/ស្រុក នាយការិយាល័យផងដែរ។

តាកែវ៖ វេលាម៉ោង១២:៣០នាទី ថ្ងៃទី២៣ ខែឧសភា ឆ្នាំ២០២៣ កម្លាំងមន្ទីរស្រាវជ្រាវនិងបង្ក្រាបបទល្មើស កងរាជអាវុធហត្ថខេត្តតាកែវ ដឹកនាំដោយលោក វរសេនីយ៍ត្រី ចាន់ ជៀប អនុប្រធានមន្ទីរ បានចុះបង្ក្រាបករណីជួញដូរ និងប្រើប្រាស់ដោយខុសច្បាប់នូវសាធាតុញៀន នៅចំណុចភូមិស្លា ឃុំតាអូ ស្រុកគិរីវង់ ខេត្តតាកែវ ដោយឃាត់ខ្លួនជនសង្ស័យបានចំនួន ០៣នាក់ និងចាប់យកវត្ថុតាងពាក់ព័ន្ធមួយចំនួនទៀត។ បច្ចុប្បន្នជនសង្ស័យ រួមនឹងវត្ថុតាងត្រូវបានមន្ត្រីជំនាញកសាងសំណុំរឿងតាមនីតិវិធី។