បាត់ដំបង៖ រសៀលថ្ងៃទី១៤ ខែសីហា ឆ្នាំ២០២៣ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស អមដំណើរដោយលោក លោក ឧត្តមសេនីយ៍ត្រី ហែម វុទ្ធី មេបញ្ជាការ កងរាជអាវុធហត្ថខេត្តបាត់ដំបង បានអញ្ជើញចុះពិនិត្យទីតាំងដីសម្រាប់សាងសង់អគារទីបញ្ជាការកងរាជអាវុធហត្ថខេត្ដបាត់ដំបងថ្មី ដែលក្រសួងរៀបចំដែនដីនគរូបនីយកម្ម  សំណង់សុរិយោដី និងក្រសួងក្រសួងកសិកម្ម រុក្ខាប្រមាញ់ និងនេសាទទើបតែកាត់ឱ្យបញ្ជាការដ្ឋានកងរាជអាវុធហត្ថខេត្តបាត់ដំបង ស្ថិតនៅភូមិច្រាបក្រសាំង សង្កាត់វត្ដគរ ក្រុងបាត់ដំបង ខេត្ដបាត់ដំបង។

ក្រចេះ៖ នៅបញ្ជាការដ្ឋាន កងរាជអាវុធហត្ថខេត្តក្រចេះ ព្រឹកថ្ងៃទី១៤ ខែសីហា ឆ្នាំ២០២៣ បានរៀបចំកិច្ចប្រជុំត្រួតពិនិត្យ និងកែលើរបាយការណ៍ការអនុវត្តតួនាទី ភារកិច្ច ការងាកងងរាអាវុធហត្ថប្រចាំខែសីហា និងទិសដៅងារការខែកញ្ញា ឆ្នាំ២០២៣ ក្រោមអធិបតីភាព លោកវរសេនីយ៍ឯក ម៉ៅ រ៉ាន្នី មេញ្ជាការរង និងជានាយសេនាធិការ កងរាជអាវុធហត្ថខេត្តក្រចេះ និងមានការអញ្ជើញចូលរួមពីលោក មេបញ្ជាការរង ទទួលជំនាញ  ប្រធាន-អនុប្រធានមន្ទីរ នាយការិយាល័យដែលមានការពាក់ព័ន្ធ មេបញ្ជាការ មេបញ្ជាការរងមូលដ្ឋាន កងរាជអាវុធហត្ថក្រុង-ស្រុក។

កំពត៖ នៅវេលាម៉ោង ២០ និង ៣០នាទី ថ្ងៃទី១៣ ខែសីហា ឆ្នាំ២០២៣ កម្លាំងជំនាញការិយាល័យប្រឆាំងគ្រឿងញៀន និង អង្គភាពនគរបាលយុត្តិធម៌នៃមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តកំពត សហការជាមួយកម្លាំងមូលដ្ឋានកងរាជអាវុធហត្ថក្រុងកំពត ដឹកនាំដោយលោកវរសេនីយ៍ឯក សេង វិច្ឆិកា មេបញ្ជាការរង ទទួលជំនាញគ្រឿងញៀន ។ កម្លាំងបានចុះបង្ក្រាបមុខសញ្ញាជួញដូរ ឬប្រើប្រាស់ដោយខុសច្បាប់នូវសារធាតុញៀន នៅចំណុចភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត ដោយបានឃាត់ខ្លួនជនសង្ស័យបានចំនួន០១នាក់ និងចាប់យកវត្ថុតាងពាក់ព័ន្ធមួយចំនួន។ បច្ចុប្បន្នជនសង្ស័យ និងវត្ថុតាងត្រូវបានមន្ត្រីជំនាញកងរាជអាវុធហត្ថចាត់ការតាមនីតិវិធី។

កំពង់ធំ៖ ព្រឹកថ្ងៃចន្ទ ទី១៤ ខែ សីហា ឆ្នាំ២០២៣ នៅបញ្ជាការដ្ឋានកងរាជអាវុធហត្ថខេត្តកំពង់ធំ លោកវរសេនីយ៍ឯក ប៊ុន ឃី នាយសេនាធិការ កងរាជអាវុធហត្ថខេត្តកំពង់ធំ បានដឹកនាំប្រជុំផ្សព្វផ្សាយរបាយការណ៍ត្រួតពិនិត្យ ការអនុវត្តតួនាទី ភារកិច្ចកងរាជអាវុធហត្ថខែសីហា ទិសដៅខែកញ្ញា ឆ្នាំ២០២៣ ដោយមានសមាសភាពចូលរូម នាយសេធិការរង ប្រធានមន្ទីរ នាយការិយាល័យ និងមេបញ្ជាការមូលដ្ឋាន ក្រុង/ស្រុកទាំង៩។

ស្ទឹងត្រែង៖ ព្រឹកថ្ងៃទី១៤ ខែសីហា ឆ្នាំ២០២៣ នៅបញ្ជាការដ្ឋានកងរាជអាវុធហត្ថខេត្តស្ទឹងត្រែង លោក វរសេនីយ៍ឯក ឈាត វាសនា មេបញ្ជាការរង និងជានាយសេនាធិការ កងរាជអាវុធហត្ថខេត្តស្ទឹងត្រែង បានដឹកនាំប្រជុំត្រួតពិនិត្យការអនុវត្តតួនាទី ភារកិច្ច និងវឌ្ឍនភាពការងារកងរាជអាវុធហត្ថប្រចាំខែសីហា និងទិសដៅការងារខែកញ្ញា ឆ្នាំ ២០២៣ ដោយមានសមាសភាពចូលរួម មេបញ្ជាការរង ប្រធានមន្ទីរ នាយការិយាល័យ ជំនួយការ។

កំពង់ស្ពឺ៖ កាលពីវេលាម៉ោង ម៉ោង១៦:៣០នាទី ថ្ងៃទី១៣ ខែសីហា ឆ្នាំ២០២៣ ការិយាល័យព្រហ្មទណ្ឌ បានទទួលជនសង្ស័យម្នាក់ពីមូលដ្ឋានកងរាជអាវុធហត្ថស្រុកគងពិសី ពាក់ព័ន្ធនឹងករណីធ្វើឱ្យខូចខាតដោយចេតនា ប្រព្រឹត្តកាលវេលាម៉ោង ០១ :៣០នាទី ឆ្លងចូលថ្ងៃទី១៣ ខែសីហា ឆ្នាំ២០២៣ នៅចំណុចក្រុមហ៊ុនអារ៉ូម៉ា ៩៩៩៩(ភោជនីយដ្ឋាន និងខារ៉ាអូខេ) ស្ថិតនៅក្នុងភូមិស្វាយ ឃុំស្រង់ ស្រុកគងពិសី ខេត្តកំពង់ស្ពឺ ។ ក្រោយពីធ្វើការសាកសួរជនសង្ស័យបានសារភាពថាខ្លួនបានផឹកស្រាវឹងវាយបំផ្លិចបំផ្លាញសម្ភារក្រុមហ៊ុនពិតប្រាកដមែន ៕

បន្ទាយមានជ័យ៖ នៅវេលាម៉ោង១៥ និង២០នាទី ថ្ងៃទី១១ ខែសីហា ឆ្នាំ២០២៣  កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន  នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានឃាត់ជនសង្ស័យម្នាក់ករណី លួចមានស្ថានទម្ងន់ទោស (ឆក់កាបូប) ប្រព្រឹត្តកាលពីវេលាម៉ោង០៣ និង០០នាទីយប់ចូលថ្ងៃទី១១ ខែសីហា ឆ្នាំ២០២៣ នៅចំណុចមុខកាស៊ីណូកាឡាក់ស៊ី ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នមន្ត្រីជំនាញបានបញ្ជូនជនសង្ស័យទៅសាលាដំបូងខេត្តចាត់ការតាមនីតិវិធី។

កណ្តាល៖ រសៀលថ្ងៃទី១១ ខែសីហា ឆ្នាំ២០២៣ លោក វរសេនីយ៍ទោ កែវ សំណាង នាយសេនាធិការ កងរាជអាវុធហត្ថខេត្តកណ្តាល បានដឹកនាំនាយសេនាធិការរង ប្រធានមន្ទីរ និងនាយការិយាល័យប្រជុំពិភាក្សាផ្សព្វផ្សាយរៀបចំកន្លែងសម្រាប់ធ្វើការងារតាមបណ្តាមន្ទីរ-ការិយាល័យ និងប្រជុំត្រួតពិនិត្យកែតម្រូវរបាយការណ៍ប្រចាំខែសីហា ទិសដៅខែកញ្ញា ឆ្នាំ២០២៣ ព្រមទាំងផ្សព្វផ្សាយណែនាំការងារផ្សេងៗមួយចំនួនទៀតរបស់អង្គភាព នៅសាលប្រជុំទីបញ្ជាការកងរាជអាវុធហត្ថខេត្តកណ្តាល ៕

ឧត្តរមានជ័យ៖ ដោយមានការដឹកនាំ និងចង្អុលបង្ហាញផ្ទាល់ពីលោក ឧត្តមសេនីយ៍ត្រី លី ដារិទ្ធ មេបញ្ជាការកងរាជអាវុធហត្ថខេត្តឧត្តរមានជ័យ កាលពីថ្ងៃទី១០ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកត្រពាំងប្រាសាទ ខេត្តឧត្តរមានជ័យ ដឹកនាំដោយលោក វរសេនីយ៍ត្រី កើត ខេមរៈ មេបញ្ជាការស្រុក បានចុះបង្ក្រាបករណីរក្សាទុក ឬប្រើប្រាស់ដោយខុសច្បាប់នូវសារធាតុញៀន នៅចំណុចភូមិស្រែកណ្ដាល ឃុំ-ស្រុកត្រពាំងប្រាសាទ ខេត្តឧត្តរមានជ័យ លទ្ធផលឃាត់ខ្លួនជនសង្ស័យ ២នាក់ និងចាប់យកវត្ថុតាងរួមមានម្សៅក្រាមពណ៌សថ្លា (ម៉ាទឹកកក) កញ្ចប់ធំ ២កញ្ចប់ និងកញ្ចប់តូច ៣កញ្ចប់…