កម្លាំងអាវុធហត្ថតាមបណ្តារាជធានី ខេត្ត ឈរតាមគោលដៅនិងចេញល្បាតការពារសន្តិសុខ រក្សា​សណ្តាប់ធ្នាប់​ជូន​ប្រជាពលរដ្ឋ​ថ្ងៃចូលឆ្នាំថ្មី

អហផទ៖ បុណ្យចូលឆ្នាំថ្មី ឆ្នាំវក អដ្ឋស័ក ពុទ្ធសករាជ២៥៦០ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០១៦ កម្លាំងអាវុធហត្ថ​នៅតាមបណ្តារាជធានី ខេត្ត បាននិងកំពុងពង្រាយកម្លាំងតាមគោលដៅសំខាន់ៗ និងល្បាតតាមភូមិសាស្ត្រទាំងថ្ងៃ ទាំងយប់ ដើម្បី​ការពារ​សន្តិសុខ រក្សាសុវត្ថិភាព សណ្តាប់ធ្នាប់ របៀបរៀបរយជូនប្រជាពលរដ្ឋ ក្នុងឱកាសរីករាយជួបជុំគ្រួសារ ដើរកំសាន្ត​រមណីយដ្ឋាននានា។ កងរាជអាវុធហត្ថជាផ្នែកមួយនៃកងយោធពលខេមរភូមិន្ទមានតួនាទីសំខាន់ៗដូចជា៖ រ៉ាប់រងសកម្មភាព​ប៉ូលិស​រដ្ឋបាល ប៉ូលិសតុលាការ តម្រួតយោធា និងផ្តល់កម្លាំងជួយដល់ស្ថាប័ននានាតាមការស្នើ។ ដើម្បីរក្សាបានសន្តិសុខ សុវត្ថិភាព ក្នុងឱកាសចូលឆ្នាំថ្មីនេះ កងរាជអាវុធហត្ថលើផ្ទៃប្រទេស បានចេញបទបញ្ជាលិខិតលេខ០១/២០១៦ បជ ចុះថ្ងៃទី០១ ខែមីនា ឆ្នាំ២០១៦ ស្តីពីការការពារសន្តិសុខ រក្សាសុវត្ថិភាព ក្នុងឱកាសបុណ្យចូលឆ្នាំថ្មីប្រពៃណីជាតិ មេបញ្ជាការកងរាជអាវុធហត្ថ​លើផ្ទៃប្រទេស​បានចេញបញ្ជាដូចខាងក្រោម៖ ១/ ការបង្ការ៖ -ធ្វើការផ្សព្វផ្សាយដល់មហាជននិងអំពាវនាវឱ្យមាន​ការចូលរួមក្នុងការ​ពង្រឹង​អនុវត្តច្បាប់និងបទបញ្ជារបស់រាជរដ្ឋាភិបាល -ប្រើគ្រប់វិធីសាស្ត្រដើម្បីស្រាវជ្រាវក្តាប់ជាប់នូវព័ត៌មានទូទៅ ពិសេសគឺ​ព័ត៌មានដែល​ប៉ុនប៉ងបង្កចលាចល និងព័ត៌មានពាក់ព័ន្ធបទល្មើសគ្រប់ករណី -ចាត់តាំងកម្លាំងឆ្មក់ត្រួតពិនិត្យអាវុធជាតិផ្ទុះ។ ២/ ការការពារ៖ ចាត់តាំងកម្លាំងការពារតាមគោលដៅសំខាន់ៗ ចាត់តាំងកម្លាំងមធ្យោបាយល្បាតតាមដងផ្លូវសាធារណៈ ទីប្រជុំជន រមណីយដ្ឋាន កន្លែងសប្បាយភាព។ ៣/ ការរក្សាសណ្តាប់ធ្នាប់៖ សម្រួលចរាចរណ៍តាមដងផ្លូវដែលមានការកកស្ទះនានា សហការជាមួយសមត្ថកិច្ចពាក់ព័ន្ធ អាជ្ញាធរដែនដី ការពារសន្តិសុខ រក្សាសណ្តាប់ធ្នាប់ជូនប្រជាពលរដ្ឋ មុននិងក្រោយថ្ងៃចូលឆ្នាំថ្មី។ ៤/ ការស្រាវជ្រាវនិងបង្ក្រាប៖ ស្រាវជ្រាវគ្រប់គ្រងមុខសញ្ញាព្រហ្មទណ្ឌ និងមុខសញ្ញាបង្កភាពអុកឡុក បង្កចលាចល​ធ្វើឱ្យ​បាត់​សណ្តាប់ធ្នាប់សន្តិសុខនិងសង្គម។ ៥/ ការជួយសង្គ្រោះ៖ ត្រៀមកម្លាំង មធ្យោបាយ រថយន្តអគ្គិភ័យ រថយន្តសង្គ្រោះ ថ្នាំពេទ្យ បរិក្ខារពេទ្យ ត្រូវសហការនៅតាមមន្ទីរពេទ្យពាក់ព័ន្ធក្នុងភូមិសាស្ត្ររបស់ខ្លួនទទួលខុសត្រូវ ជំនួយអន្តរាគមន៍ ក្នុងឧបទ្ទវហេតុដែលកើតមានឡើង។