អហផទ៖ នៅព្រឹកថ្ងៃទី១៩ ខែមករា ឆ្នាំ២០១៦ ឯកឧត្តម នាយឧត្តម សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសព្រៃឈើ បាននឹងកំពុងដឹកនាំឯកឧត្តម សមាជិក នៃគណៈកម្មការជាតិចុះត្រួតពិនិត្យទីតាំងស្តុកឈើនៅភូមិរលួស ឃុំរលួសមានជ័យ ស្រុកសំបូរ ខេត្តក្រចេះ រួចបានបន្តចុះត្រួតពិនិត្យនៅខេត្តមណ្ឌលគិរីទៀត។
សូមបញ្ជាក់ថា នៅក្នុងកិច្ចប្រជុំនៅព្រឹកថ្ងៃទី១៨ ខែមករា ឆ្នាំ២០១៦ អង្គប្រជុំបានប្តេជ្ញាចិត្តខ្ពស់ ក្នុងការទប់ស្កាត់និងបង្ក្រាបបទល្មើសព្រៃឈើ តាមសេចក្តីសម្រេចរបស់រាជរដ្ឋាភិបាល ដោយរៀបចំផែនការយុទ្ធសាស្ត្រ មានយន្តការច្បាស់លាស់ ដើម្បីសម្រេចបាននូវភារកិច្ចរបស់ខ្លួនដោយជោគជ័យ។ នៅថ្ងៃខែដដែលវេលាម៉ោង១៤និង៣៥នាទី ឯកឧត្តម នាយឧត្តម សៅ សុខា ប្រធានគណៈកម្មការជាតិ ទប់ស្កាត់និងបង្ក្រាបបទល្មើសព្រៃឈើ បានដឹកនាំសមាជិកនៃគណៈកម្មការជាតិ ចុះដល់ទីតាំងស្តុកឈើនៅខេត្តត្បូងឃ្មុំ ដើម្បីត្រួតពិនិត្យជាក់ស្តែង។
គណៈកម្មការជាតិបានរៀបចំមជ្ឈមណ្ឌលប្រតិបត្តិការ២៤\២៤ម៉ោង ទទួលព័ត៌មានអំពីបទល្មើសព្រៃឈើ ដែលមានទូរស័ព្ទលេខ៖ ០២៣ ៦៦៦៧៦៦៧, ០២៣ ៦៣៦៧៣៦៧, ០២៣ ៦៦៦៨៦៦៨។ គណៈកម្មការជាតិក៏សូមអំពាវនាវដល់ប្រជាពលរដ្ឋនិងអ្នកសារព័ត៌មានឱ្យចូលរួមសហការផ្តល់ព័ត៌មានអំពីបទល្មើសព្រៃឈើនេះផងដែរតាមរយៈលេខទូរស័ព្ទខាងលើ៕
