អហផទ៖ នៅព្រឹកថ្ងៃទី១៤ ខែកញ្ញា ឆ្នាំ២០១៥ នៅបញ្ជាការដ្ឋានកងរាជអាវុធហត្ថលើផ្ទៃប្រទេស ឯកឧត្តម ឧត្តមសេនីយ៍ឯក វង្ស ពិសេន មេបញ្ជាការរងនិងជានាយសេនាធិការ កងរាជអាវុធហត្ថលើផ្ទៃប្រទេស បានជួបសំណះសំណាលជាមួយសិក្ខាកាមនៃកងរាជអាវុធហត្ថចំនួន២០នាក់ ដែលត្រៀមចេញទៅរៀនសូត្រនៅប្រទេសវៀតណាម។ សិក្ខាកាមនឹងចាកចេញនៅថ្ងៃទី១៥ ខែកញ្ញា ឆ្នាំ២០១៥ រៀនអំពីជំនាញការពារសន្តិសុខផ្ទៃក្នុង រយៈពេល៣ខែ។ ឯកឧត្តម ឧត្តមសេនីយ៍ឯក មេបញ្ជាការរង បានមានប្រសាសន៍ណែនាំដល់សិក្ខាកាមទាំងអស់ឱ្យគោរពវិន័យ រក្សាសីលធម៌ សេចក្តីថ្លៃថ្នូរ ខិតខំរៀនសូត្រ ត្រូវចេះដេញដោលសួរគ្នាទៅវិញទៅមកនូវខ្លឹមសារដែលលោកគ្រូដាក់ឱ្យ ចេះសាមគ្គីគ្នា ហាមមិនឱ្យពាក់ព័ន្ធនឹងគ្រឿងញៀន និងត្រូវធ្វើយ៉ាងណាឱ្យភាគីវៀតណាមកោតសរសើរដល់កងរាជអាវុធហត្ថ។ ក្នុងឱកាសនោះដែរ ឯកឧត្តម ឧត្តមសេនីយ៍ឯក មេបញ្ជាការរង បានឧបត្ថម្ភថវិកាដល់សិក្ខាកាមចំនួន២០នាក់ក្នុងម្នាក់ៗទទួលបាន ១០០ដុល្លារ។
