កម្លាំងកងរាជអាវុធហត្ថលើផ្ទៃប្រទេស សហការជាមួយ កម្លាំងកងរាជអាវុធហត្ថស្រុកស្នួល បង្ក្រាបបទល្មើសព្រៃឈើ

ក្រចេះៈ ដោយគោរពតាមបទបញ្ជា ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ត្រូវយកចិត្តទុកដាក់ពង្រឹង លើកិច្ចការងារបង្ក្រាបបទល្មើសព្រៃឈើ ជាក់ស្តែង នៅវេលាម៉ោង០៤ និង០០នាទីទាបភ្លឺ ថ្ងៃទី១៦ ខែវិច្ឆិកា ឆ្នាំ២០១៦ កម្លាំងកងរាជអាវុធហត្ថលើផ្ទៃប្រទេស សហការជាមួយ កម្លាំងកងរាជអាវុធហត្ថស្រុកស្នួល បានធ្វើការបង្ក្រាបករណីដឹកជញ្ជូនឈើល្មើសច្បាប់ចំនួន០១លើក ស្ថិតនៅចំណុចភូមិក្បាលស្នួល ឃុំស្នួល ស្រុកស្នួល ខេត្តក្រចេះ។

នេះបើយោងទៅតាមប្រភពពត៌មានពី លោកឧត្តមសេនីយ៍ត្រី សាន្ត ប៊ុនថាន មេបញ្ជាការ កងរាជអាវុធហត្ថខេត្តក្រចេះ បានថ្លែងប្រាប់ភ្នាក់ងារ GRK News ឱ្យដឹងថា ការឃាត់រថយន្តខាងលើនេះ គឺធ្វើឡើងស្របពេលដែលរថយន្តខាងលើបំរុង ដឹកជញ្ជូនឈើប្រណិតទាំងនោះ ទៅប្រទេសវៀតណាមកាត់តាមខេត្តត្បូងឃ្មុំ។

លោកឧត្តមសេនីយ៍ត្រី បានបញ្ជាក់បន្ថែមទៀតថា ក្នុងប្រតិបត្តិការបង្ក្រាបបទល្មើសនោះផងដែរ កម្លាំងកងរាជអាវុធហត្ថ ក៏បានចាប់យកវត្ថុតាងមួយចំនួនរួមមាន រថយន្ត NISSAN NAVARA ពាក់ស្លាកលេខ ភ្នំពេញ 2AA-1830
រួមជាមួយឈើប្រណិតពេញមួយរថយន្ត (មិនទាន់វាស់វែង)។

វត្ថុតាង ត្រូវមន្ត្រីជំនាញកងរាជអាវុធហត្ថខេត្តក្រចេះ កំពុងកសាងសំណុំរឿង ដើម្បីប្រគល់ជូនខណ្ឌរដ្ឋបាលព្រៃឈើ ចាត់ការបន្តតាមនិតិវិធី។

(អត្ថបទៈ ម៉ាន់ ដាវីត)