កម្លាំងអាវុធហត្ថស្នាក់ការសន្តិសុខទំនប់រលកឃាត់ខ្លួនចោរកាត់កម៉ូតូបាន២នាក់

អហ ព្រះសីហនុ៖ នៅវេលាម៉ោង១២និង០០នាទី ថ្ងៃទី២៧ ខែសីហា ឆ្នាំ២០១៥ មានករណីលួចមានស្ថានទម្ងន់ទោសមួយកើតឡើងបង្ក​ដោយជនសង្ស័យ០២នាក់។ 1-ឈ្មោះ សុខ ហេង ភេទប្រុស អាយុ២៩ឆ្នាំ មុខរបរនិងទីលំនៅមិនពិតប្រាកដ។ 2-ឈ្មោះ ជា សុធី ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅ ផ្ទះជួលក្រុម20 ភូមិ01 សង្កាត់04 ក្រុង/ខេត្តព្រះសីហនុ។ ជនសង្ស័យបានធ្វើសកម្មភាពកាច់​សោរកម៉ូតូ ម៉ាកCBR ពាក់ស្លាកលេខភ្នំពេញ 1CS-8041 ពណ៌ស របស់ជនរងគ្រោះឈ្មោះ អ៊ឹម ផេងហុង ហៅដូង ភេទប្រុស អាយុ១៦ឆ្នាំ មុខរបរសិស្ស ទីលំនៅកន្លែងកើតហេតុខាងលើ ខណៈពេលដែលជនរងគ្រោះបានយកម៉ូតូទៅក្នុងរបងមុខផ្ទះអ្នកជិតខាង (ម្ចាស់មិននៅផ្ទះ) ហើយជនរងគ្រោះចេញមករៀននៅផ្ទះរបស់ខ្លួន ឃើញដូចនេះជនសង្ស័យឈ្មោះ សុខ ហេង បានចូលធ្វើសកម្មភាពកាច់សោករ និងផ្តាច់ខ្សែភ្លើង ដោយអោយឈ្មោះ ជា សុធី ជាអ្នកឈរចាំមើលផ្លូវ បន្ទាប់ពីធ្វើសកម្មភាពបានសម្រេចម៉ូតូអត់ឆេះ ហើយឈ្មោះ សុខ ហេង បណ្តើរចេញមក​ក្រៅរបង ដោយអោយឈ្មោះ ជា សុធី ជាអ្នករុញពីក្រោយ រុញបានប្រហែលជា30ម៉ែត្រ សាក្សីឈ្មោះ សោម ដេងស្រាន់ ហៅឆេង អាយុ15ឆ្នាំ មុខរបរសិស្ស ទីលំនៅកន្លែងកើតហេតុឃើញ ហើយបានរត់មកប្រាប់ម្ចាស់ម៉ូតូ ម្ចាស់ក៏ជិះម៉ូតូតាមរក លុះដល់ចំណុចក្រុម33 ភូមិ03 សង្កាត់01 ក្រុង/ខេត្តព្រះសីហនុ ក៏បានប្រទះឃើញម៉ូតូនិងជនសង្ស័យកំពុងបណ្តើរនិងរុញម៉ូតូ ហើយម្ចាស់ក៏ស្រែកអោយគេជួយ ឃើញដូចនេះជនសង្ស័យក៏ទុកម៉ូតូចោលហើយរត់គេចខ្លួន ក្រោយពីទទួលបានព័ត៌មានភ្លាមកម្លាំងស្នាក់ការសន្តិសុខទំនប់រលក តាមរកនិងបានឃាត់ខ្លួនជនសង្ស័យនៅចំណុចក្រុម17 ភូមិ03 សង្កាត់01 ក្រុង/ខេត្តព្រះសីហនុ។ ជនសង្ស័យទាំងពីរនិងវត្ថុតាងបញ្ជូនមក​បញ្ជាការដ្ឋាន​កងរាជអាវុធហត្ថខេត្ត ដើម្បីកសាងនីតិវិធីបន្ត។